તંત્રીલેખ

ભારત આજે એક એવા વળાંક પર ઊભું છે જ્યાં સીમાઓ પરના યુદ્ધ કરતાં દેશની અંદર ખેલાતું 'માહિતી યુદ્ધ' (Information War) વધુ ઘાતક સાબિત થઈ રહ્યું છે. જ્યારે દેશના લાખો વિદ્યાર્થીઓ પોતાનું ભવિષ્ય NEET જેવી પરીક્ષાઓમાં શોધી રહ્યા હોય, ત્યારે તેમની આશા અને આક્રોશને હથિયાર બનાવીને આખા રાષ્ટ્રને અસ્થિર કરવાનું જે કાવતરું રચાયું છે, તે માત્ર એક પરીક્ષાનો વિવાદ નથી, પરંતુ ભારતની સાર્વભૌમત્વ સામે ફેંકાયેલો એક ગંભીર પડકાર છે. શાસનની વહીવટી મર્યાદાઓ કે સફળતાઓની ચર્ચા તો થતી રહેશે, પરંતુ અત્યારે જે સત્ય સમજવાની જરૂર છે તે આ આંદોલનોના પડદા પાછળ છુપાયેલા 'ડીપ સ્ટેટ'ના ખેલ વિશે છે.

અહીં 'ડીપ સ્ટેટ' (Deep State) શબ્દનો ગૂઢ અર્થ સમજવો અનિવાર્ય છે. 'ડીપ સ્ટેટ' એટલે દેશની ચૂંટાયેલી સરકારની સમાંતર ચાલતું એક એવું અદ્રશ્ય અને શક્તિશાળી સત્તાતંત્ર, જે પડદા પાછળ રહીને દેશની નીતિઓ, અર્થતંત્ર અને સામાજિક સ્થિતિને પ્રભાવિત કરે છે. તેમાં માત્ર વિદેશી એજન્સીઓ જ નહીં, પણ દેશની અંદર રહેલા કેટલાક બૌદ્ધિકો, એનજીઓ, મીડિયાના હિસ્સાઓ અને ટેકનોલોજી જાયન્ટ્સનો સમાવેશ થાય છે. તેમનો મુખ્ય ઉદ્દેશ્ય રાષ્ટ્રને અંદરથી એટલું નબળું પાડવાનો હોય છે કે તે વૈશ્વિક ફલક પર નતમસ્તક થઈ જાય. જ્યારે અમેરિકી દૂતાવાસ દિલ્હીમાં મોટા મેળાવડાની અગાઉથી આગાહી કરે અથવા જ્યારે ફેસબુક અને ઇન્સ્ટાગ્રામ ચલાવતી 'મેટા' કંપની વડાપ્રધાનનો ભરોસો આપતો વિડિયો 'ટેકનિકલ ખામી'ના નામે બ્લોક કરી દે, ત્યારે આ ડીપ સ્ટેટના પંજા સ્પષ્ટ દેખાઈ આવે છે.

આ આખા પ્રકરણમાં જે સૌથી મોટું કૌભાંડ છે, તે છે યુવા માનસનું સુનિયોજિત અપહરણ. અમુક નિષ્ણાતો જ્યારે ઉચ્ચ પદો પર બેઠેલા વ્યક્તિઓના અસંવેદનશીલ નિવેદનોને આક્રોશનું નિમિત્ત ગણાવે છે, ત્યારે તે સાચું છે, પરંતુ તે માત્ર એક ચિનગારી છે. અસલી આગ તો વિદેશી તાકતો લગાવી રહી છે જેમને ભારતની પ્રગતિ ખૂંચે છે. જંતર-મંતર પર જે હિંસા જોવા મળી, તેમાં પથ્થરમારો કરનારાઓ નીટના પરીક્ષાર્થીઓ નહીં, પણ તાલીમબદ્ધ ગુંડાઓ હતા જેઓ દેશની સંસદને સળગાવવાની અને ભારતને નેપાળ કે બાંગ્લાદેશ જેવી અરાજકતા તરફ ધકેલવાની વાતો કરી રહ્યા હતા. અભિજીત દીપકે અને સોનમ વાંગચુક જેવા ચહેરાઓનો ઉપયોગ કરીને જે રીતે લાગણીઓ ભડકાવવામાં આવી રહી છે, તેની પાછળ વિદેશી ભંડોળ (FCRA) અને ચોક્કસ એજન્ડા કામ કરી રહ્યો છે તે હવે છૂપું રહ્યું નથી.

શાસન દ્વારા MBBS બેઠકોમાં ૨૬૦ ટકાનો વધારો કરવો કે પેપર લીક વિરોધી કઠોર કાયદા લાવવા એ આવકાર્ય છે, પરંતુ રાષ્ટ્ર સામેનો ખતરો આનાથી ક્યાંય મોટો છે. જ્યારે દેશમાં વિદેશી ભંડોળ પર નજર રાખવામાં આવે છે, ત્યારે જ અમુક સેલિબ્રિટીઓ અને સક્રિય કાર્યકરો મેદાનમાં આવે છે, તે કોઈ અકસ્માત નથી. આ એક બૌદ્ધિક આતંકવાદ છે જે વિદ્યાર્થીઓના રોષને 'ઈંધણ' તરીકે વાપરીને લોકશાહીના સ્તંભોને તોડવાનો પ્રયાસ કરે છે. ચીન અને અમેરિકા જેવી મહાસત્તાઓના હિતો ક્યાંક ને ક્યાંક ભારતમાં અસ્થિરતા ઈચ્છે છે, જેથી ભારત હિંદ મહાસાગર કે વૈશ્વિક અર્થતંત્રમાં પ્રભુત્વ ન જમાવી શકે.

આજના આ યુદ્ધમાં માહિતી એ જ શસ્ત્ર છે અને સોશિયલ મીડિયા એ યુદ્ધભૂમિ છે. જ્યારે વડાપ્રધાનનો વિડિયો ગાયબ કરી દેવામાં આવે અને હિંસા ભડકાવતા વિડિયોને વાયરલ થવા દેવામાં આવે, ત્યારે સમજવું જોઈએ કે ડિજિટલ પ્લેટફોર્મ્સ આ ડીપ સ્ટેટના મુખ્ય ખેલાડી બની રહ્યા છે. આ દેશના યુવાનોએ સમજવું પડશે કે જો તેઓ જાગૃત નહીં થાય, તો તેઓ અજાણતા જ પોતાના દેશના વિનાશના સાધનો બની જશે. શિક્ષણ મંત્રીનું રાજીનામું માંગવું એ કદાચ લોકશાહીનો હિસ્સો હોઈ શકે, પણ રાજીનામાના નામે સંસદ સળગાવવાની વાત કરવી એ દેશની સ્વતંત્રતા અને અખંડિતતા માટે લાલબત્તી સ્વરૂપ છે.

દેશના વિદ્યાર્થીઓ પર લાઠીચાર્જ કે ગોળીબાર કરવો પડે એ નિંદનીય પગલું તો છે જ પણ તેની આડમાં દેશ વિરોધી તત્વો ફાવી ન જાય એની પણ પૂરતી તકેદારી સમય પર લેવાવી જોઈએ. વિદ્યાર્થીઓની આડમાં છુપાયેલા રાષ્ટ્ર ઘાતક લોકોને ઝડપથી છૂટા પાડીને જેલના સળિયા પાછળ મુકવા જ જોઈએ અને ફરીથી આ લોકો દેશના તેજ, ગૌરવ અને સુખ- શાંતિને હણી ન શકે એવી વ્યવસ્થા ગોઠવવી જોઈએ. દેશના યુવાનોને આ ઘટનાના એન્ટિવાયરસ તરીકે દેશભક્તિનું ડોઝ સમય પર આપવાની યોગ્ય વ્યવસ્થા કરવાની જરૂરિયાત જણાય છે. કેમ કે, આ માત્ર એક શાસકની લડાઈ નથી, પણ ભારતીય રાષ્ટ્રની અખંડિતતાની લડાઈ છે. આપણે પરીક્ષા પદ્ધતિને શુદ્ધ કરવાની સાથે સાથે આપણા સામાજિક નેતૃત્વને પણ શુદ્ધ કરવું પડશે. યુવાનોએ 'ડીપ સ્ટેટ'ના આ અદ્રશ્ય દોરડાઓથી મુક્ત થવું પડશે. જો આપણે આ છદ્મવેશી આંદોલનોના મુખવટા નહીં ઉતારીએ, તો આવનારી પેઢી આપણને ક્યારેય માફ નહીં કરે. સત્ય એ છે કે ભારતને હરાવવા માટે અત્યારે બહારના દુશ્મનો કરતાં અંદરના 'મોહરા'ઓ વધુ સક્રિય છે. જાગૃત ભારત અને સજ્જ યુવા શક્તિ જ આ અદ્રશ્ય પંજાને તોડી શકશે. રાષ્ટ્રહિત એ જ સર્વોપરી ધર્મ હોવો જોઈએ, બાકીનું બધું ગૌણ છે.

* * *