અભ્યાસિકા મંડળ: ત્રૈમાસિક અહેવાલ

" કૌશલમ" એટલે વ્યક્તિત્વ નિર્માણના ( Personality Development) કાર્યને વેગ આપવા માટે એક અનોખો પ્રકલ્પ.

આજના આધુનિક સ્પર્ધાત્મક યુગમાં સફળતા પ્રાપ્ત કરવા માટે આપણે આપણાં પોતાના ભારતીય દર્શનમાં નિર્દેશિત કેટલાક મૂળભૂત કૌશલ્યો પ્રાપ્ત કરવા જરૂરી છે. કૌશલમ આવા વિશિષ્ટ કૌશલ્યો પ્રાપ્ત કરવા માટેનો એક પ્રયાસ છે "કૌશલમ".

આ કાર્યશાળા બે ચરણ માં વહેચાયેલી છે :

૧) પૂર્વ કૌશલમ : આ ચરણમાં પ્રતિભાગીઑ નું મૂલ્યાંકન ત્રી-સ્તરીય પરીક્ષા પદ્ધતિ દ્વારા કરવામાં આવે છે.

૨) કૌશલમ : આ બીજું ચરણ એટલે પાંચ દિવસીય નિવાસી કાર્યશાળા, કે જેમાં દેશભરના જાણીતા ઉધોગપતિઓ, રાજકારણીઓ, શિક્ષણવિદો, સામાજિક કાર્યકરો અને વિદ્વાનો, દેશભરમાંથી તારવણી કરીને પસંદ કરેલા ૨૫ યુવા સહભાગીઓ સાથે તેમના બહોળા અનુભવોનું કથન કરે અને મૂલ્યવાન માર્ગદર્શનનુ ભાથું જીવનરાહ માટે બાંધી આપે.

સમગ્ર ભારતમાંથી ફક્ત ૨૫ ઉમેદવારો આ વર્કશોપમાં સહભાગી બનવા માટે પસંદગી પામે છે. પસંદગી પામેલા સહભાગીઓએ ૫ દિવસ માટે નક્કી કરેલા સ્થાન પર જ રહેવાનું હોય છે. સવારથી જ દિવસભર મહાનુભાવોના સેશન અને એક્ટિવિટી અને સાંજે ભોજન પછી પણ થોડા હળવા સત્રો અને એક્ટિવિટી. આમ ૫ દિવસ માટે સતત જ્ઞાન અને અભ્યાસનો તીવ્ર પ્રવાહ સહભાગીઓ પર ખુબ જ હકારાત્મક છાપ છોડતો જણાય છે.

આ વર્ષે કૌશલમ ૨૦૨૫ નું આયોજન વડોદરા જિલ્લા ના પોર પાસે આવેલા કાયાવરોહણ ગામમાં આવેલા લકુશલીશધામમાં કરવામાં આવ્યું હતું. "જીવનની નોંધનીય ઘટનાઓમાંથી એક ઘટના એટલે કૌશલમ", સામાન્ય રીતે દરેક સહભાગીઓનો કાઇંક આવી રીતે જ પ્રતિસાદ રહેતો હોય છે. ખરેખર કૌશલમ એ આજના સમયમાં વ્યક્તિ નિર્માણ ના યથાર્થ પ્રકલ્પ છે.

***