વેચવાના છે...

ભૂલથી કરેલા રાતના ઉજાગરા વેચવાના છે,
બારી બારણાની સાથે મિજાગરા વેચવાના છે.

મળી જાય કોઈ ખરીદનાર તેની રાહમાં બેઠો છું,
સાવ સાદા અને સરળ ભણકારા વેચવાના છે.

વૈદે નાડી તપાસી કહ્યું હજુ ઘણું આયુ બાકી છે,
છતાં, સાવ મફતના ભાવે ધબકારા વેચવાના છે.

મજધારે હતાં એ જ સારું હતું, બાદમાં સમજાયું
એકલા અટુલા સૂનકાર કિનારા વેચવાના છે.

આમ પણ કોઈ ઇચ્છા બાકી નથી રહી જયકિશન
તૂટતા દરેક તારાના ચમકારા વેચવાના છે

***