અભ્યાસિકા મંડળ: ત્રૈમાસિક અહેવાલ

અભ્યાસિકા મંડળ વડોદરા દ્વારા “KNOW YOUR ABHYASIKA 2025 - How to deal with the college life” શિર્ષક સાથે માર્ગદર્શન કાર્યક્રમનું આયોજન 30 જુલાઈ 2025ના રોજ સાંજે 4 વાગ્યે ગર્લ્સ કોમન રૂમ (કોમર્સ ફેકલ્ટી પાછળ, એમ.એસ.યુ.) ખાતે કરવામાં આવ્યો હતો. આ કાર્યક્રમ ખાસ કરીને નવા વિદ્યાર્થીઓને ધ્યાનમાં રાખીને રચાયો હતો, જેથી તેઓ કોલેજ જીવનને સારી રીતે સમજી શકે અને તેમાંથી મળતા અવસરોનો લાભ લઈ શકે.

કાર્યક્રમનો મુખ્ય હેતુ વિદ્યાર્થીઓને કોલેજ જીવનમાં આવનારા પડકારો, મુશ્કેલીઓ તથા તેનું નિરાકરણ સાથે સંલગ્ન હતો. સાથે સાથે તેમને અભ્યાસિકા મંડળ કેવી રીતે કાર્ય કરે છે, તેની પ્રવૃત્તિઓ અને વિદ્યાર્થી હિત માટેની યોજનાઓ વિશે માહિતગાર કરવાનો હતો.

કાર્યક્રમની શરૂઆત સ્વાગત શબ્દોથી કરવામાં આવી. ત્યારબાદ અભ્યાસિકા મંડળના પ્રતિનિધિઓએ મંડળની રચના, તેનો ઇતિહાસ અને અત્યાર સુધીના કાર્ય વિશે વિગતવાર રજૂઆત કરી. વિદ્યાર્થીઓને જણાવાયું કે કોલેજ જીવન માત્ર અભ્યાસ પૂરતું નથી, પરંતુ તે જીવનનો એવો તબક્કો છે જ્યાં વ્યક્તિગત વિકાસ, નેતૃત્વ, જવાબદારી તથા સમાજ પ્રત્યેની સમજણ વિકસાવવામાં આવે છે.

મુખ્ય વક્તવ્યમાં કોલેજ જીવનમાં સમયનું યોગ્ય આયોજન, પડકારો સામે ધૈર્યપૂર્વક ઊભા રહેવાની કળા, વિકાસ માટે મળતા અવસરોનો સદુપયોગ, મિત્રતા અને સહકારના મૂલ્યો તથા અભ્યાસિકા મંડળ દ્વારા મળતી સહાયમાં સક્રિય ભાગ લેવાની જરૂરીયાત જેવા મુદ્દાઓ પર ભાર મુકાયો.

આ કાર્યક્રમ દ્વારા વિદ્યાર્થીઓએ સમજ્યું કે તેઓએ પહેલેથી જ પોતાની જિંદગીના પડકારોનો સામનો કરવો જોઈએ, અને સાથે સાથે સ્વવિકાસ તથા સામૂહિક વિકાસ બંને માટે સક્રિય રહેવું જોઈએ. અભ્યાસિકા મંડળ તેમના માટે એક સહાયક અને માર્ગદર્શક પ્લેટફોર્મ બની રહેશે.

૧૨૫ જેટલા વિદ્યાર્થીઓએ કાર્યક્રમમાં ઉત્સાહપૂર્વક ભાગ લીધો. જેમાંથી ઘણાં વિદ્યાર્થીઓએ અભ્યાસિકા મંડળ સાથે જોડાઈને આગળની પ્રવૃત્તિઓમાં ભાગ લેવા ઉત્સુકતા દર્શાવી.

આમ, “KNOW YOUR ABHYASIKA 2025” કાર્યક્રમ સફળ અને અસરકારક સાબિત થયો. નવા વિદ્યાર્થીઓને કોલેજ જીવન વિશે જ્ઞાન, માર્ગદર્શન અને પ્રેરણા મળી, જે તેમની ભવિષ્યની યાત્રામાં મદદરૂપ થશે.

***