પૂછ જાતને, શું એ ઈશ્વર નથી ?

શબ્દથી સમજણ સુધી, મારાથી તારા સુધી,
જે પહોંચે છે બહુવિધિ, પૂછ જાતને, શું એ ઈશ્વર નથી ?

અંતરમાં વિરાજે વિચારે, કર્મ થકી પ્રગટે જે આચારે,
શીખવાડે વિવેક જે વ્યવહારે, પૂછ જાતને, શું એ ઈશ્વર નથી ?

ચર રૂપે સઘળે જે રહ્યો રમી, થઇ અચર બ્રહ્માંડે રહ્યો શમી,
જે ‘હું’ બની તને રહ્યો ગમી, પૂછ જાતને, શું એ ઈશ્વર નથી ?

જે ધર્મ મર્મ જણાવતો, સુખ-દુઃખ સૌને બતાવતો,
તારા થકી કંઇક કરાવતો, પૂછ જાતને, શું એ ઈશ્વર નથી ?

જે મનમાં પ્રશ્ન કરાવતો, થઇ નિમિત્ત જીવન શીખાવતો,
જે પ્રેમ હૃદયે ધરાવતો , પૂછ જાતને, શું એ ઈશ્વર નથી ?

જે તુજને છે આ પૂછી રહ્યો, પાછો પૂછીને હસી રહ્યો,
તારી ભીતર જે દીપી રહ્યો, પૂછ જાતને, શું એ ઈશ્વર નથી ?